- Nasa mahigit 1,400 ang aktibong
kaso ngayon ng COVID-19 sa PNP - Malaking bahagi ng mga active COVID-19 cases sa PNP ay nakakalat sa iba’t ibang quarantine facilities
- Dahil sa dumaraming
kaso ng COVID-19 at pagkapuno ng mga pagamutan at quarantine facilities, pinag-aaralan ng PNP na gawing quarantine facility ang ilang bahagi ng Camp Crame
Umabot na sa mahigit 670,000 ang tinamaan ng COVID-19 dito sa bansa. Noong mga nakaraang linggo ay nasa 5,000 hanggang 7,000 mahigit ang naitatalang bagong kaso ng COVID-19, kaya naman ipinatupad na ang granular lockdown sa malaking bahagi ng NCR at ang tinawag nilang “NCR Plus.”
Sa muling pagtaas ng kaso ng COVID-19 at pagpapatupad ng lockdown, isa ngayon sa pinoproblema ng maraming local government units ay ang pagkapuno ng mga pagamutan at quarantine facility sa kanilang lugar at mga karatig-lugar.
Kasabay ng pagtaas ng bilang ng mga tinatamaan ng coronavirus sa hanay ng kapulisan, isa ngayon sa kanilang pinag-aaralan ay ang pagko-convert ng ilang bahagi ng Camp Crame upang gawing quarantine facility.
Sa balita kamakailan ay sinabi ni PNP officer-in-charge Lt. Gen. Guillermo Eleazar na sa kabuuan, 1,446 ang kasalukuyang aktibong kaso ng COVID-19 sa PNP. Mula sa bilang na ito, 51 ang nasa ilang pagamutan habang 1,395 naman ang kasalukuyang nakakalat sa iba’t ibang quarantine facilities.
Kaya naman pinaplano ng PNP na magdagdag ng quarantine o isolation facilities para sa mga miyembro na tinamaan ng virus. Ani Eleazar, nakikipag-ugnayan na sila sa mga kinauukulan upang maumpisahan na ang mga gagawing quarantine facility sa loob ng Camp Crame.
“[S]a loob ng ating Camp Crame tumingin na kami sa mga facilities na puwede namin ma-convert na quarantine o isolation facilities para sa sitwasyon na kung talagang tataas pa ay meron tayo paglalagyan para sa ating mga kasamahan,” ani ng kasalukuyang PNP officer-in-charge.
Matatandaan na nagpositibo si PNP Chief Debold Sinas sa COVID-19 kaya naman si Eleazar muna ang pansamantalang humalili sa kanyang puwesto.
Nasa libo-libo man ang kaso ng COVID-19 case sa PNP, 61% naman umano ng kabuuang kaso sa Metro Manila ang naka-recover na mula sa virus. Patuloy din ang isinasagawang vaccination program sa PNP.
Sa kasalukyan, nasa higit 2,000 PNP health personnel na ang naturukan ng COVID-19 vaccine.
