Lawa sa loob ng main crater ng Taal, natuyot na dahil sa sobrang init ng bulkan

  • Inanunsyo na ng PHIVOLCS ang pagkatuyot ng lawa sa loob ng main crater o bunganga ng Taal
  • Kapansin-pansin din daw ang mga dagdag na bitak at pamamaga ng crater nito dahil sa sobrang init ng bulkan
  • Sunud-sunod na volcanic earthquakes din ang naranasan ng mga taga-Batangas dahil sa patuloy na pag-aalburuto ng Bulkang Taal

Dulot ng sobrang taas na temperatura ng bulkang Taal, natuyot na ang lawa sa loob ng main crater nito – bagay na inanunsyo ng PHIVOLCS sa bulletin na kanilang inilabas nitong Miyerkules, January 15, 2020.

Imahe mula sa video ng 24-Oras via YouTube Channel

Base sa mga satellite images na nakuha nila, ipinaliwanag ng PHIVOLCS na sa sobrang init ng bulkan ay nag-vaporize na ang tubig sa lawa at nagresulta sa pamamaga ng main crater. Kapansin-pansin din daw ang karagdagang mga bitak sa bunganga nito.

Dagdag pa nila, ilang bahagi rin ng Pansipit River ang nanuyot na dahil sa bahagyang pagtaas o pag-alsa ng Taal Region bunsod ng sunud-sunod na paglindol. Posible rin daw na mayroong nagaganap na underwater fissure o mga bitak na siyang  sumisipsip sa tubig ng ilog. Ang Pansipit River ang nagsisilbing drainage outlet ng Taal Lake.

Imahe mula sa Facebook | PHIVOLCS

Sa ngayon, nananatiling nasa Alert Level 4 ang Bulkang Taal na ang ibig sabihin ay posibleng magkaroon ng “hazardous eruption” sa mga susunod na araw. Dahil dito, patuloy na inoobserbahan ng PHIVOLCS ang pag-aalburoto ng bulkan. Nakapagtala rin ang ahensya ng 53 volcanic earthquakes simula 5:00 a.m. hanggang 4:00 p.m. ngayong Miyerkules.

Samantala, kamakailan ay nagbabala ang PHIVOLCS na maaaring magkaroon ng “volcanic tsunami” lalo na’t nasa Alert Level 4 pa rin ang bulkan. Bukod pa rito, sinabi rin nila na maaaring tumagal pa hanggang pitong buwan ang pag-aalburoto ng Taal kaya hinihikayat nila na pansamantalang lumisan ang mga naroon sa danger zones o high-risk areas. Walang tigil din ang kanilang pagpapaalala sa mga residente na mag-ingat sa epekto ng matinding ashfall.


Loading...
Do NOT follow this link or you will be banned from the site!
%d bloggers like this: